MATAPOS pasaringan ni Pangulong Noynoy Aquino ang tatlong ahensiya ng gobyerno na kinabibilangan ng National Irrigation Administration (NIA), Bureau of Immigration (BI) at Bureau of Customs (BoC) sa kanyang State of the Nation Address noong Lunes dahil sa talamak na korapsyon ay kaagad ipinakita ni Commisioner Ruffy Biazon ang kanyang delicadeza dahil ilang oras pa lang ang nakalilipas ay kaagad itong nagsumite ng resignation sa pinakamataas na lider ng bansa.
Ito marahil ang nawawalang katangian ng isang lider ng bansa sa kasalukuyang panahon dahil importante pa rin sa ating mga mamamayan ang delicadeza na kung saan dito nakikita at nasasalamin kung kapit-tuko o may ginagawang kalokohan ang isang tao sa kanyang pwesto.
Dito na rin natin napatunayan na mayroon pa palang ilang tao sa bansa na mas importante ang kanyang pangalan kaysa sa pera at kapangyarihan at diyan tayo lalong humanga sa batang Biazon.
Maging sa agarang sagot ni PNoy sa resignation ng BoC boss ay lalo tayong nagulat dahil malinaw sa binitawan nitong pahayag na hindi si Biazon ang salot sa Aduana kundi ang kanyang mga tauhan na ilang taon na rin namang nagpapasasa sa pwesto.
Malinaw sa pahayag ni PNoy sa kanyang SONA noong Lunes na ang salot na burukrasya ang nagbibigay ng sakit ng ulo sa gobyerno upang maituwid ang landas patungo sa tunay na reporma.
Ito marahil ang kahulugan ng kanyang hiling sa Kongreso na kaagad rebisahin ang Civil Service Code ng bansa dahil ito ang nagiging kanlungan at sandigan ng mga dorobo sa pamahalaan.
Isang konkretong halimbawa nito ang nangyayari ngayon sa BoC dahil gaano man katino at katuwid ang lider nitong si Biazon ay hindi niya maisasakatuparan ang kanyang mga reporma sa Aduana dahil hindi niya magalaw o agad masibak ang mga dorobong ito dahil sa proteksyon ng Civil Service Law.
Panahon na nga para kastiguhin ang mga tao sa likod ng korapsyon ng BoC at dito makikita nating desidido at sinsero ang Pangulo katuwang si Biazon sa usaping ito dahil ilang araw mula ngayon ay may mangyayaring balasahan sa Aduana na tiyak namang magpapayanig sa mga dorobo rito.
Sa maikling salita, napuno na ang salop ni PNoy sa naturang ahensya kaya’t mag-antabay lang tayo dahil malapit na ring mabago ang Aduana na matagal na rin namang panahong pinagpasasaan ng mga ganid at buwaya sa pamahalaan.
The post BIAZON KATANGI-TANGING LIDER appeared first on Remate.
