HABANG nakatutok ang lahat sa pork barrel scandal ay parang napababayaan na rin yata ang ibang problema ng bansa kaya nakapagpatayo raw ng mga concrete block ang China sa may Panatag (Scarborough) Shoal sa West Philippine Sea.
Tsk, tsk, tsk. Sinamantala ng China ang pagiging abala ng mga opisyal ng ating bansa sa pork barrel scam na ito kaya malaya silang nakapaglagay ng mga concrete block.
Hindi lang ang West Philippine Sea, nakalimutan na rin ng ating mga opisyal ng gobyerno na maraming mga Filipinong nagugutom ngayon dahil inuuna nila ang pagpaplano kung paano sila makalulusot kung sakaling isangkot sila ni pork barrel queen Janet Lim-Napoles sa kaso.
At habang isinisigaw ng mga Filipino ang resign Noynoy at Binay Movement at pag-abolish ng pork barrel ay parang nawala yata sa sarili itong si Senate Finance Committee Chaiman, Senator Francis Escudero, at sa loob lang ng sampung minuto ay agad nitong inaprubahan ang P2.82 billion na 2014 budget ni Pangulong PNoy.
Katuwiran ni Escudero na isang administration ally ay wala naman daw isyu sa Office of the President (OP) dahil tradisyon na raw na bigyan ng “courtesy” ang tanggapan ng Pangulo at Pangalawang Pangulo.
Kaalyado lang kasi ni Escudero ang Pangulo kaya hindi na ginisa pa itong si Executive Secretary Paquito Ochoa, Jr. at inaprubahan agad ang budget. ‘Yan ang Tuwid na Daan ng Pangulong Noynoy.
Kailan pa kaya tayo makae-encounter ng politikong kaalyado ng Pangulo na handang suwagin ang kanyang amo kapag ito ay mali?
Hay naku, kung ganito nang ganito naman ang mga opisyal ng ating pamahalaan, makababangon pa kaya tayo? Kailan tayo kikilos? Kapag lugmok na lugmok na ang ating bayan?
o0o
NARITO sa bansa ang US Department of State Assistant Secretary na si Ambassador William Brownfield, para pangunahan ang International Narcotics and Law Enforcement Programming.
Makikipag-meeting daw si Brownfield sa mga leader ng ating bansa, mga opisyal ng ating law enforcement at mga representative mula sa iba’t ibang Non-Government Organizations (NGO) para pag usapan ang problema sa droga.
May kahinatnan naman kaya ang pakikipag-usap na ito ni Ambassador Brownfield sa ating mga laaw enforcement agency, partikular na sa Philippine Drug Enforcement Agency o PDEA?
Apat na araw na mananatili itong si Brownfield na bukod sa pakikipag-meeting sa ating mga leader ay palalawigin din nito ang partnership ng America at Pilipinas kaugnay ng Criminal Justice Systems, counter-narcotics, anti-corruption at police modernization.
Bukas po ang Lily’s Files para sa inyong mga reklamo, suhestiyon at komento, mag-text lang po sa 09165571946 at 09087230036 o kaya ay mag-email lamang sa …lpr_2012@yahoo.com.
The post GOBYERNO NAKATUTOK SA SCAM, IBANG PROBLEMA NAKALIMUTAN appeared first on Remate.
