MUKHANG kahit anong gawin ni Senador Alan Cayetano ay hindi niya makukuha ang endorso ng anak ni Tita Cory na si Pangulong Noynoy Aquino sa halalang presidensyal sa 2016.
Kung kilala mo kasi ang ugali ni PNoy ay tiyak na tapos na ang usapang Alan at Aquino dahil marami rin naman kasing hindi magandang sinabi itong si Alan laban sa unico ihong anak ni Tita Cory noong 2010 elections.
Alam ng lahat na si Cayetano ang tagabanat noon ni Villar kay PNoy kaya 99 porsyento na ang kasiguraduhan na hindi nito makukuha ang endorso ng Malakanyang.
Maging sa pahayag ni Press Sec. Herminio Coloma ay mukhang ang tabang-tabang ng dating ni Cayetano sa kanilang kampo at sa Pangulo kaya’t lalo pang luminaw ang ating sapantaha na negative itong asawa ni Lani Cayetano sa endorso ng administrasyon.
Siyempre, ang mga binibitiwang pahayag ni Coloma ay ikinokunsulta rin niya sa Pangulo kaya malinaw na magsasariling kayod itong si Cayetano para marating niya ang pagkapangulo ng bansa.
Malinaw rin na ang nangyaring pagkabigo ni Cayetano na makuha ang endorsement ni PNoy para sa kanyang bataan na kanyang inilaban sa pagkapangulo ng barangay sa buong bansa ay isang senyales na rin na dedma sa kanya ang Pangulo.
Tiyak ding alam ni PNoy ang balita noong nakalipas na eleksyon na ang utak ng demolition job kina Senador Loren Legarda at Chiz Escudero ay si Alan na isa sa mga ikokonsidera ng Pangulo.
Marami ang nagsasabing nagtatanim ng galit itong si PNoy at iyan ang huhusga sa kapalaran ni Mang Alan.
Tiyak na marami pang mangyayari sa itatakbo ng pulitika sa bansa pero isa lang ang tiyak; wala sa equation ni PNoy si Cayetano.
The post CAYETANO WALANG DATING KAY PNOY appeared first on Remate.
