PANGUNGUNAHAN ng Philippine Health Insurance Corporation (PhilHealth) at Department of Health ang paglulunsad ngayong umaga, ang programang “ALAGA KA para sa Maayos na Buhay” o ALAGA KA Program.
Ang ALAGA KA ay isang malawakang kampanya kasama ang mga lokal na pamahalaan para lalong maihatid sa 14.7 milyong mahihirap na pamilya ang mga pangunahing serbisyong kalusugan (primary care) ng PhilHealth at DOH.
Ang paglulunsad ay sabay-sabay na gaganapin sa mga pangunahing lungsod sa lahat ng 17 rehiyon sa bansa. Sa Kalakhang Maynila ay gaganapin ang pasinaya sa Quezon Memorial Circle na inaasahang dadaluhan ng 2,000 mahihirap na miyembro.
Ayon kay PhilHealth President and CEO Alexander A. Padilla, layunin ng ALAGA KA na maipaalam sa mga kinauukulan ang kanilang benepisyo para magamit ang mga ito hindi lamang sa pagkakasakit kundi maging sa pagpapanatili ng kanilang kalusugan.
“Sa panig ng PhilHealth ay may nakalaan sa kanilang mga serbisyo sa ilalim ng TSeKaP o Tamang Serbisyo para sa Kalusugan ng Pamilya na makakamtan sa mga health center kung saan sila nakatala. Ito ang katunayang sila ay totoong inaalagaan ng ating pamahalaan,” pagdiriin ni Padilla.
Kasama sa TSeKaP ang libreng konsultasyon; regular blood pressure monitoring; pagpapayo sa pagpapasuso at pagtigil sa paninigarilyo; screening para sa breast at cervical cancers; digital rectal exam; at iba pa.
Kabilang din ang complete blood count; pagsusuri sa ihi, dumi at plema; fasting blood sugar; at chest X-ray batay sa rekomendasyon ng doktor; kasama ang mga gamot sa hika, matinding pagdudumi; pulmonya at impeksyon sa daluyan ng ihi o UTI.
Naniniwala si Padilla na sa pamamagitan ng TSeKaP ay mahihikayat ang mga mahihirap na magpatingin sa doktor kahit walang karamdaman.
Bukod sa kanilang updated member data record ay bibigyan din sila ng seminar ukol sa kanilang mga benepisyo at kung paano gamitin ang mga ito.
The post PHILHEALTH: “ALAGA KA PARA SA MAAYOS NA BUHAY” appeared first on Remate.
