MULING susubukan ang Pasig River Ferry para makatulong sa lumalalang traffic sa Metro Manila, sabi ni MMDA Chairman Atty. Francis Tolentino.
Nangyari na ito minsan, noon pa man ay nakita na ang Pasig na posibleng daanan ng tao para umiwas sa sobrang traffic sa mga lansangan pero hindi nagtuloy-tuloy ang project noong una.
Ano kaya ang kaibahan sa plano ng MMDA ngayon kumpara noon, ano ang bago bukod sa magandang pangalan – Okay Ka Ferry Ko – at bukod sa libreng kape para mga sasakay sa Pasig Ferry?
Wala ako masyadong matanungan ng opinyon tungkol sa noong unang isinulong ang Ferry Transpo sa Pasig, wala halos akong kakilala na nakasakay roon noon.
May isang staff lang ako na nagsabi na naaalala niya na ayaw niyang sumakay sa ferry noon kasi mabaho at nakasusuka ang mga mga basura na daraanan sa ilog.
Noon din ay problema ang maraming water lilies na sagabal sa waterways at nakapagpabagal ng biyahe.
Nito lang isang linggo ay kumalat ang video sa Facebook tungkol sa kamangha-mangha at successful transportation system via trains sa siyudad ng Bogota sa Colombia.
Ang daming likes at shares ang nasabing video sa FB dahil sa pagka-efficient ng transpo system doon at kinainggitan ng marami, lalo na ng mga Pinoy.
Pero ang transpo system sa Bogota ay resulta ng maraming taon ng pag-aaral at marahil ay trials and errors. Ngayon ay maayos na itong nakalatag.
Lahat ng anggulo ay napag-isipan at nalagyan ng solusyon at lahat ng isyu ay na-cover ng mga transpo designer at city planner.
Kaya walang hitch sa kahit saang sulok na pinupuntahan ng train saanman sa lungsod at kaya napaka-successful ng mass transport system sa Bogota sa Colombia na tunay na kinaiingitan ng buong mundo ngayon.
Sigurado na susubukan ko ang bagong Pasig Ferry ride na mag-uumpisa sa araw na ito.
Suportado ko ang kanilang “one more try” attempt at sana nga ay napag-isipan ito at naiayos kumpara sa noong una itong na-introduce sa masa.
Good luck sa lahat.
The post ONE MORE TRY, GOOD LUCK appeared first on Remate.
