IBA ang karisma at hatak ngayon sa tao ni Pangulong Noynoy Aquino III.
Malinaw kasi sa kanyang pamamalakad na kontra siya sa anomang katiwalian sa gobyerno at ito ang kanyang pinatunayan sa kanyang walang habas na anti-corruption campaign sa kanyang administrasyon.
Ito rin ang nakita ng mamamayan sa malaking tiwala ng negosyante dahil sa patuloy na pag-angat ng ekonomiya ng bansa.
Sa naturang mga kaganapan, ang tanging benepisyaryo ng kabanguhan ni PNoy sa taumbayan ay ang kanyang mga pambato sa Team PNoy na kung saan halatang-halata naman na ang Pangulo ang kanilang sandigan at sinasandalan.
Maging ang campaign ads ng mga ito ay nakabase sa adbokasiya ng Pangulo na “tuwid na daan” kaya’t hindi maitatangging nakasakay sila sa popularidad ng ating Presidente.
Bukod sa kampanya kontra katiwalian ay patuloy rin ang mga proyekto ng Pangulo para iangat ang estado ng ‘Pinas at mga mamamayan nito katulad ng patuloy na conditional cash transfer program ng DSWD, matitinong kalye sa lahat ng panig ng bansa, matinong health care program at marami pang iba.
Sa simpleng paliwanag kung umaangat ang puno ay tiyak na aangat rin ang mga bunga nito dahil saludo ang mamamayan sa kanyang ginagawa at liderato.
Marami pang magagandang bunga ang matinong pamamahala ni PNoy sa bansa at sa kanyang mga kandidato kaya’t i-expect na natin ang landslide victory ng Team PNoy sa Senado at sa iba pang lokal na posisyon sa bansa.
