AYON kay Engineer Emer Rojas, pangulo ng New Vois Association Philippines (NVAP) at bilang isang “buhay” na babalang pangkalusugan, ginamit nya ang kanyang karanasan para magsalita ukol sa masamang epekto ng paninigarilyo at ang epekto rin nito sa ekonomiya at lipunan.
Ang pagsali ng NVAP sa kampanya kontra paninigarilyo ang nagpapalakas sa kanilang panawagan, “i-kontrol ang paninigarilyo sa bansa”. Nang magkaroon ng mga debate sa Kamara noong 2012, gumawa ng kilos ang mga kasapi ng samahan nang ilan sa kanila ay tumayo sa kinauupuan, at tinanggal ang kanilang takip sa leeg upang makita ng lahat ang butas sa kanilang lalamunan.
May ilang bansa na nagpapatupad ng graphic health warnings, gumagamit sila’y ng totoong larawan ng mga taong may kanser o ibang sakit dulot ng paninigarilyo.
Ang ideya nito ay magkaroon ng emosyonal at sikolohikal na pagpukaw na naghihkayat sa mga naninigarilyo nito na tumigil at manakot sa mga susubok pa lang na manigarilyo.
“Hindi naging matagumpay ang mga babalang salita lamang ang nilagay sa mga pakete nito sa loob ng ilang taon. Hindi ito nakapagbigay ng tamang kaalaman sa masamang epekto ng paninigarilyo. Hindi makapangyarihan ang salita lamang kaysa sa imahe. Pumupukaw ng damdamin ang larawang, babalang ito at hindi sila nagsisngungaling dahil imahe sila ng mga biktima ng paninigarilyo. Hindi ito ginuhit o ginawa ng computer. Mga tao sila na may totoong sakit.” Dagdag ni Rojas.
Sinabi ni Rojas na ang mga larawang ito ay inaasahang gagawa ng resulta sa mga mahihirap, lalo na sa kaunti lamang ang pinag-aralan at mga kabataang lantad sa mga picture-based messages.
Ayon sa Global Youth Tobacco Survey (GYTS), isa sa apat na kabataang Pilipino edad 13-15 pataas ay naninigarilyo. 28.3% ay lalaki. ANG INYONG LINGKOD/DR. HILDA ONG
