MALINAW sa pahayag ng nakakulong na si Senador Jinggoy Estrada na dapat ding managot ang lahat ng senador o mambabatas na sangkot sa PDAF at DAP scam.
Ito ang kitang-kita sa sinabi ni Estrada matapos niyang sabihin na si dating senador Edong Angara ay naglaan o naglagay rin ng kanyang pork barrel sa kanyang sariling foundation na Kalusugan ng bata, Karunungan ng Bayan, Inc.
Klaro sa ipinukol ni Jinggoy na pahayag na marapat lamang imbestigahan ang lahat ng mambabatas maging ito man ay kalaban o kaalyado ng gobyerno.
Kataka-taka ring dedma na si DoJ Sec. Leila de lima sa pagsasampa ng kaso sa mga sangkot sa pork barrel scam, lalo na sa mga kaalyado ng gobyerno at ito ang malinaw sa punto ni Jinggoy na selective ang administrasyong ito sa idiniriin lamang na tao.
Maging si PNoy ay tahimik na rin sa pork barrel scam dahil maging siya mismo ay sangkot dito dahil sa kontrobersiyal na DAP na ginamit umano na pansuhol sa senador na nag-convict kay dating chief justice Renato Corona.
MRF SA MUNTI
Napapanahon ang pagbubukas ng dalawang Material Recovery Facility (MRF) sa Muntinlupa City na pinangunahan ni Mayor Jaime Fresnedi bilang pakikiisa ng alkalda sa selebrasyon ng Earth Day 2015.
Sa pamamagitan kasi nito, mababawasan na ang mga basurang itatapon ng lungsod dahil maaari na itong ma-recycle sa pamamagitan ng mga pasilidad na inilagay sa mga barangay ng Sucat at Poblacion.
Bukod dito, mabibigyan din ng livelihood project ng MRF ang mga residente ng mga nabanggit na barangay dahil sila mismo ang maghihiwalay sa mga basura na maaari pang mapakinabangan na mai-recycle.
Sabi nga ng mga residente, mababawasan na ang mga itatapon na basura ng kanilang lungsod ay mabibigyan pa sila ng pagkakakitaan ng kanilang alkalde kaya’t puro pasasalamat ang ipinararating ng mga ito kay Fresnedi.
Malaking bagay ang MRF sa bawat lugar dahil pinipili rito ang mga basura na maaari pang mapakinabangan bago ito tuluyang itapon sa dumpsite kaya’t dapat lamang nating saluduhan ang aksyon na ito ni Mayor Fresnedi. ALINGAWNGAW/ALVIN FELICIANO
