TILA nakontrata na nina VP Jojo Binay at Sec. Mar Roxas ang primetime hours ng mga TV at radio, ganundin ang front pages ng print media.
Bakit kanyo? Aba’y sa nakaraang mga araw sila ang pangunahing laman ng tri media. At ang nakabandera ay ang kanilang bangayan. Kung dati’y ang mga alipores nila ang nagsisilbing tagapasalita sa isyu, ngayon ay sina Sec. Mar at VP Binay na ang mga starring.
Akusasyon after akusasyon ang kanilang mga ipinuputak sa isa’t isa.
Si Binay ay sabit umano sa iba’t ibang anomalya sa lungsod ng Makati, Boy Scouts of the Philippines, HLURDC at Pag-IBIG Office. Ang sabi naman ni VP, si SILG ay pasok daw sa mga maanomalyang programa tulad ng Disbursement Accelaration Program.
Kumbaga, batuhan sila ng putik, bagay na hindi na nakakatuwa, bagkus ay ikinakairita na ng mga nakakabasang sambayanan. Imbes na makabuluhang programa para kina Mang Juan at Aling Maria ang tinatalakay, ang inuungkat nila’y kanilang kalokohan.
Wari natin, sila’y nagdedebate na ang laman ng kanilang talakayan ay baho ng bawa’t isa para makuha ang suporta ng bayan. Malayong-malayo tayo sa maraming bansa na ang sukatan ng balitaktakan ay serbisyong igagawad sa taumbayan kapag nagwaging Pangulo.
Sa ipinakikitang init ng ulo nina VP Binay at Sec. Mar, mukhang hindi pa matatapos ang batuhan nila ng ‘katiwalian’.
Kaya dapat maghanda sina Mang Juan at Aling Maria sa mga patusadahan pa ng umiinit na pulitika – starring Jojo at Mar.
Mapanonood pa natin silang na magbabangayan sa TV, radio at diyaryo na ang tema ng talakayan ay kanilang mga baho.
Kaya kung may ‘matinong’ Pinoy na kabaligtaran sa style nina Binay at Roxas, ito ang tamang pagkakataon para lumabas at magpakilala.
‘Yon bang kapag ibabalita sa TV, radyo at diyaryo ay programa at proyekto sa bayan ang nanggaling sa kanyang bunganga.
At kapag lumabas ang ‘presidentiable’ na ‘yan, tiyak na siya ang alternatibo ng mga Pinoy na kanilang Pangulo sa 2016.
Wanna bet! CHOKEPOINT/BONG PADUA
