NAKAKUKUHA ng lisensiya ang marami na hindi naman alam ang mga dapat at hindi dapat sa pagmamaneho ng behikulo sa lansangan.
Ito Ang Totoo: halimbawa ng hindi alam ay ang paggamit ng “flasher,” ito iyong “signal lights” na sabay-sabay pinaiilaw ng patay-sindi sa apat na sulok ng sasakyan (iyong iba meron pa sa side-mirror).
Kapag naka-flasher, ibig-sabihin ay may emergency o problema.
Ang mga “signal light” na siya talagang gamit para ipaalam sa ibang motorista kung kakaliwa o kakanan ang sasakyan, kapag ginamit bilang “flasher,” hindi na malaman kung saan patungo ang sasakyan, kakaliwa o kakanan ba?
Problema ito kapag malakas ang ulan dahil sa “low visibility” o limitado ang makikita ng ilang distansiya dala ng buhos ng ulan.
Oo nga’t mas makikita ang behikulo kapag naka-flasher sa gitna ng malakas na buhos ng ulan pero hindi na matanto kung kakaliwa o kakanan ito kaya aksidente malamang ang kahihinatnan dahil sa maling gamit ng “signal lights” bilang “flasher.”
Kung tutuusin, dapat alam ng lahat ng nagkaka-lisensiya sa pagmamaneho na sapat na ang “park lights” sa araw o kahit “low head lights” sa gabi kapag umuulan at ang pag-flash ay nagdudulot lamang ng dagdag na panganib dahil nakalilito sa iba ang intensyon ng nagmamaneho.
Isa pang kaeng-engan ng mga nagmamaneho sa hi-way ang tila kawalan ng kaalaman na ang mga mababagal na sasakyan, tulad ng mga truck, jeepney o trycicle (na talaga namang bawal sa hi-way pero pinababayaan) ay dapat nasa “outer lane” o malapit sa gilid ng daan at ang matutulin ay nasa “inner lane” o bandang gitna.
Sa kahabaan ng Jose Abad Santos Avenue (JASA) na dating Gapan-San Fernando-Olongapo Road (GSO) mula Pampanga hanggang Bataan ay naglipana ang mga tricycle, oversized-jeepney at iba pang a laging nasa “inner lane” kaya ang laking abala at panganib sa ibang motorista.
Titingnan ka pa nang masama ng mga hinayupak kapag inilawan mo para sana tumabi. Paano nga ba nagka-lisensiya sa pagmamaneho ang mga ganito, itatanong mo talaga sa isip mo. Ito Ang Totoo! ITO ANG TOTOO/VIC VIZCOCHO, JR.
