ANO raw ba itong mga traffic enforcer ng Pasay City, lalo na raw ‘yung mga nasa Buendia St. sa ilalim ng flyover sa kanto ng Roxas Boulevard na oras ng trabaho ay nag-uumpukan lang ang mga ito?
Samantalang ‘yung iba naman ay nag-aabang lang ng kanilang mahuhuli kahit walang violation.
Ang lakas mangotong ‘yang mga traffic enforcer ng Pasay riyan sa Buendia sa ilalim ng flyover.
Aba’y, ano ang ginagawa ni Pasay City Mayor Antonino Calixto?
Hindi niya ba nakikita ang mga kotongero niyang traffic enforcer na walang ginagawa kundi ang mag-umpukan sa oras ng trabaho at mangotong lalo na sa Buendia sa ilalim ng flyover?
Mayor Calixto, hindi mo ba nakikita o wala bang nagbubulong sa mga tenga mo ‘yung pinaggagawa ng mga kotongero mong traffic enforcers?
Mayor, sayang lang ang pinasasahod sa kanila ng taumbayan kung puro paban-jing-banjing lang ang ginagawa ng mga ito habang nangongotong ang iba.
Ang mga malalakas daw na mangotong ay ‘yung mga may motor na inisyu ng government at kulay puti.
Sana, Mayor Calixto, pag-bawalan ninyo sila na magtambay sa oras ng trabaho, lalo na sa Buendia na daanan pa naman ng mga motorista.
Pero lalong pagbawalan ninyo silang mangotong.
KABI-KABILA ANG BOOKIES SA BATANGAS
Bukod sa bookies ng STL ni Kap. Ado ng Bgy. Sta. Maria, Sto. Tomas ay lantaran din daw ang bookies ng STL ni Kap. Jojo ng Bgy. San Pablo, Sto. Tomas, Batangas.
Ang matindi rito, kahit kabi-kabila ang bookies sa Region 4-A ay hindi man lang kumikilos si RD Gen. Richard Albano para masugpo ang operasyon ng bookies na minamantine pa ng mga kapitan ng barangay.
Isang Ryan Bacordo ang nagpapakilalang collector daw siya ni PD kaya ‘di matinag ang operasyon ng bookies ng dalawa.
***
Anomang reklamo o puna ay i-text lamang sa 09189274764, 09266719269 o i-email sa juandesabog@yahoo.com. JUAN DE SABOG/JOHNNY MAGALONA
