ANO na ngayon, mga Bro, matapos ang mga debate ng mga kandidato sa pagka-Pangulo sa halalang 2016?
Tinatanong natin ito sa harap ng tila kawalan ng pagbabago sa buhay ng nakararami at pananatili ng itsura ng lipunan na atin nang bungaran simula ng ating pagkasilang at pagtanda.
MGA USAPIN
Korapsyon, kahirapan ng mga magsasaka at obrero, dinastiya o paghahari ng iilang pamilya sa ating pamahalaan at pulitika, kwalipikasyon ng mga kandidato, kapayapaan at kaayusan, krimen droga at smuggling, panlabas na relasyon ng bansa at iba pa.
Nagpagandahan ang mga kandidato ng pananaw sa mga usaping ito sa mata at pandinig ng milyon-milyong mamamayan sa bisa ng media.
Naglatag din sila ng kanilang mga plataporma de gobyerno.
Siyempre pa, may mga nag-iringan din at nagbatuhan ng putik makaraang paborito yata ng isa sa kanila ang mangulapol ng putik sa iba.
Normal lang naman ito dahil sa magkakalaban nga sila sa pulitika. Mayroon pang mga kasunod na debate na idaraos ibang mga lugar.
Lalong lilinaw kung ano-anong prinsipyo ang dala-dala ng mga ito. At magsisilbing pangako na rin ang mga binibitiwan ng mga ito na pabor sa mamamayan.
BANTAYAN
Dahil sa magsisilbing pangako ang bawat salita ng mga politikong ito, dapat na ring magbantay ang mga mamamayan.
Isa sa mga dapat bantayan ng mga mamamayan ang pagpako sa mga pangako ng mga politiko.
Pero hindi lang ito, mga Bro, ang dapat na bantayan. Marami sa mga politiko, isama na natin ang mga presidentiable na sumali sa debate, ang sumisirko.
‘Yun bang === Tuwid na Daan ang sinasabi ngunit sa huli Tuwad na Daan pala.
Para sa iba, wala silang makitang ganyang daan kundi liko-liko na, sira-sira at maputik pa.
Ginamit nating halimbawa ang Tuwid na Daan dahil pinag-aagawan yata ng ilan sa mga presidentiable ang salitang ito para angkinin at sa paniniwala nila ay mananalo sila.
Ito’y kahit na pupwedeng ikalalaglag nila ito sa bangin. Hehehe.
DEBATE WALANG SILBI
Totoo, malaki ang maitutulong ng debate sa pagpili ng mga mamamayan ng kanilang gustong iluklok sa Malakanyang.
Lalo na kung totoong lalabas ang ngalan ng kanilang mga iboboto. Pero paano kung hindi lalabas ang ngalan ng kanilang ibinoto? At ang ngalan ng iba ang lalabas dahil ‘yun ang itinadhana ng mga makapangyarihan?
‘Yun bang === may control sa mga vote counting machine o precinct count optical scan o anomang makina na gagamitin ng Commission on Elections para sa halalan.
May mga palatandaan na pupwede talagang walang silbi ang debate gaya ng kawalan ng resibo na iiisyu ng mga makina sa pagboto.
Isa pa ang mga depektibong makina na hindi natin alam kung gaano karami pagdating ng botohan.
Siyempre pa, iba pa ang mga canvassing na na hahaluan ng mga salitang “NOTED” at pagbalewala sa mga protesta ng mga dinaraya.
BILIHAN AT BLACKOUT
Kabilang sa mga matitinding dahilan ng kawalang silbi ng debate bilang batayan sa pagpili ng mga kandidato ang mga bilihan ng boto at at blackout.
Ukol sa blackout, hindi ba rito natalo si Inday Miriam sa kanyang kandidatura niya noon?
Kwento kasi ng kanyang mga tagasuporta, nag-blackout lang sa canvassing nabago na ang bilang ng kanyang boto.
Isa pa, may mga nagte-testing na kung paano patumbahin ang mga tore ng kuryente para sa brownout at blackout na ikinatatalo at ikinapapanalo ng mga kandidato.
Pero itong bilihan ng boto ang matindi. Nagbabahay-bahay ang mga namimili ng boto at mga lider ng mga barangay ang karaniwang bumibili sa gabi bago ang halalan.
Anak ng tipaklong, kung hindi bumabaligtad ang mga botante mismo, hinahati-hait nila ang kanilang mga pamily sa kung sino-sinong mga kandidato.
Pati nga mga simbahan ay nagiging palengke ng mga kandidato na bumibili o nagtitinda ng mga boto.
Palakihan ng abuloy o bigay sa mga simbahan, sa mga pastor, pari at kung sino-sino pang mga lider ng simbahan. At karaniwang kung sino ang makapagbigay ng malaki, siya ang ipiangdarasal na manalo sa halalan.
Heheheeeee!
BALA AT BARIL
Anoman ang sinasabing pagbabantay ng mga pulis at militar para sa mapayapa, maayos at kapani-paniwalang halalan, mayroon at mayroong gagamit ng puwersa para manalo.
Paano mananalo, halimbawa, ang isang patay nang kandidato sa bisa ng bala at baril?
Sa maraming pagkakataon, mga Bro, may mga makapangyarihan na mismong ang mga pulis at militar ang gamit nila laban sa kanilang mga kalaban.
Sa bulong ng ating Usi, mga Bro, maraming heneral at kernel ang naglalaro kung sino-sino ang mga dapat nilang sundin.
Mismo pa sa mga botohan sa mga kampo ng mga pulis at militar ay inaasahang may pagmamaniobra. At dito nawawalan din ng saysay ang debate.
oOo
Anomang reklamo o puna ay maaaring iparating sa www.remate.ph o i-text sa 09214303333. ULTIMATUM/BENNY ANTIPORDA
