HINDI kailang nanalo si Davao City Mayor Rodrigo Duterte bilang Presidente noong nakaraang eleksyon sapagkat desperado na ang mga mamamayan na magkaroon ng pagbabago sa ating Inang Bayan.
Marami ang naniwala na si Ginoong Duterte ang sagot sa pagbabago dahil galit ito sa droga at korapsyon.
Maliban pa sa kakaibang estilo nito, ang pagiging brusko. Pero hindi pa man nakakaupo o nakakapanumpa sa puwesto itong alkalde na tinatawag ng malalapit sa kanya na Digong ay marami ng nakikitang mali sa kanyang pag-uugali at asal.
Tila hindi naman tama na sa kanyang press conference ay paswitan o sipulan ang mamamahayag ng GMA 7 na si Mariz Umali.
Sabihan mang humanga sa ganda at kaseksihan ni Umali si Duterte ay hindi pa rin tama ang ginawa ng magiging pinakamataas na lider ng ating bansa na magpakita ng ugaling tambay o kanto.
Ang isa pang masakit ay umasa ang sektor ng kababaihan na ipagtatanggol ng grupong Gabriela ang mamamahayag sa ginawang pambabastos ni Duterte subalit nabigo lamang ang mga ito.
Sa halip, ipinagtanggol pa ng Gabriela ang maling gawi o asal ni Duterte.
Dahil ba President-elect na ito at kakampi nila?
Aba’y sayang naman ang boto ng maraming kababaihan na umaasang maipagtatanggol ng partylist na tinangkilik nila.
Bukod pa sa sayang ang suweldo ng representative ng Gabriela at pondong tinatanggap ng mga ito na galis sa buwis ng mamamayan.
Ang mali ay mali at hindi dapat bigyan-katwiran para lang magmukhang tama.
Tandaan nila, huwag hayaang ang mali ay maging tama sa mata ng mga bata sapagkat ito ang tutularan nila.
Hindi ang mga bagay na mali ang ipapamana natin sa kabataan na pinaniniwalaang magiging pag asa ng bayan.
Ang mali ay mali at hindi pwedeng gawing tama sa mata ng mga bata pero pwedeng itama. PAKUROT/LEA BOTONES
