PAGPALAIN NAWA ang isang negosyante na nagkaloob ng tig-P1 milyon sa pamilya ng bawat sundalo at pulis na namatay sa battle of Marawi City laban sa mga terrorist rebel na Maute at Abu Sayyaf Group.
Ang donasyon ay malaking karagdagan sa mga tulong na ibinibigay ng pamahalaang Duterte sa mga naulilang pamilya na nakararanas ng kagipitan.
Nangako si Manong Digong na hindi pababayaan ng gobyerno ang mga pamilya ng mga sundalo at pulis kaya personal na tinungo sila ng Pangulo.
Halos 150 na ang namamatay ng sundalo at pulis sa halos magtatatlong buwan nang digmaan laban sa mga terorista.
Maraming ang naiintriga ukol sa pagkatao ng private donor ngunit mas mahalaga ang ipadama sa mga mahal sa buhay ng mga bayaning kawal na namatay na hindi sila nag-iisa.
Mas ginusto ng entrepreneur with a golden heart na manatili siyang anonymous at walang maging kapalit ang kanyang pagtulog.
No strings attached, ika nga.
Sa gayon, hindi rin masasabing may political agenda ang pagtulong na ito.
Ang bawat isa sa atin ay may kakayahan na mag-alay ng mas makabuluhang pagdarasal para sa mga naulila ng mga sundalo.
Hindi matatawaran ang kabayanihan ng Marawi heroes na nag-alay ng ultimate sacrifice o pagbubuwis ng buhay.
Sinasaluduhan din natin ang mga sugatan at lahat ng tropa na patuloy na nakikipaglaban para mabawi ang Marawi City mula sa mga terorista. DEADSHOT/ERWIN TULFO
