KUNG nalalambungan man ng dilim ang daan tungo sa kapayapaan at pagkakasundo sa pagitan pamahalaan at mga rebeldeng komunista, may mga nagsisindi naman ng kandila na palatandaan ng posibilidad na pupwedeng maliwanagan ito.
Mismong si Pangulong Rodrigo Duterte ang nagpapahiwatig ng nasabing posibilidad, bagama’t may pumipigil pa sa kanya na mga konsiderasyon.
May ulat na nga ring may pakikipag-usap na ang ilang awtoridad sa mga lokal na New People’s Army sa ilang bahagi ng Mindanao.
IBA PA
Mayroon din ibang kumikilos para mapabalik sa usapang pangkapayapaan ang pamahalaan at mga rebelde.
Ilan dito ang mula sa hanay ng mga consultant ng National Democratic Front na katulad ni Luis Jalandoni.
Marami rin sa mga militanteng organisasyon ang nagsasabing gusto nilang maibalik ang usapang pangkapayapaan sa kabila ng kanilang pakikipag-iringan sa mga awtoridad.
May mga grupong relihiyoso rin na gusto talaga ang kapayapaan.
Mahigpit ding itinatanggi ng mga rebelde na nakikipagkaisa sila sa mga dilawan upang pabagsakin ang pamahalaang Duterte.
NPA AT FARC
Ang Norway na namamagitan sa usapang pangkapayapaan ay gumagawa rin ng mga paraan na maisulong ang usapan.
Iniatang na nga ng Norway kay Idun Tvedt, miyembro ng tagapangasiwa ng peace process sa pagitan ng pamahalaang Colombia at ng Fuerzas Armadas Revolucionarias de Colombia or FARC.
Itong FARC, mga Bro, ay halos kapareho ng NPA sa edad at mga prinsipyong ipinaglalaban.
Nagtagumpay ang pamahalaang Colombia at FARC na magkasunod at sa kalaunan, isinuko na ng armas nito kapalit ng ilang pabor sa kanila gaya ng pagkakaroon ng mga kinatawan sa kanilang Kongreso ng walang halalan.
Naririyan din ang pangako ng gobyerno na tumulong sa pagpapaunlad sa mga kanayunan, paglalagay ng mga kuryente at tubig at pagtatatag ng mga negosyo na kalahok ang mga mamamayan sa lugar na pagtatayuan ng mga ito.
Nagkaroon din ng pangkalahatang amnestiya at halos lahat na ng mga nabilanggong rebelde o nakasuhan ay naging malaya at wala nang kasong kinahaharap.
WALANG PUWANG
Sa ngayon, lumalabas na gustong gamitin ng mga dilawan ang kilusang rebelde para sa kanilang pansariling interes.
‘Yun bang === gusto nilang bumalik sa puwesto sa anomang paraan.
Naririyan na nga ang pagsasamantala nila sa bawat yugto ng kasaysayan gaya ng panawagan nila ng pagbabago kasabay ng mga dumarating na anibersaryo ng People Power at araw ng mga bayani.
Pero sa kasaysayan, hindi kailanman nabigyan ng puwang ang mga rebelde sa mga mahahalagang usapin.
Kabilang sa mga mahahalagang usapin ang pantay na pagkakahati-hati ng yaman ng bansa at pagkakaroon ng puwang sa kapangyarihan sa pamamahala sa bansa.
Kahit kailan ay hindi bumigay ang mga panginoong maylupa na mamahagi ng kanilang mga lupa sa mga walang lupa at kahit kailan, walang magandang pagtrato sa mga obrero.
Lagi namang winawalanghiya ng mga dilawan ang mga panukalang batas ng mga militante.
PAGBABAGO
Sa ilalim ng administrasyong Duterte, may mga palatandaan ng pagbibigay ng konsiderasyon sa mga interes ng rebelyon.
Ito nga lang Kadamay, kung noong panahon ng mga dilawan, eh, dinakip at kinasuhan na ang mga ito ng gobyerno dahil sa pagkuha nila nang sapilitan sa housing ng mga pulis at militar sa Bulacan.
Naririyan din ang talagang laban sa korapsyon at pandarambong na matagal na ring binabaka ng mga rebelde.
Kabilang sa mga pagbaka sa korapsyon at pandarambong ang pagdurog sa mga kontraktor ng mga housing project para sa mga biktima ng Yolanda.
At naririyan din ang pagsibak sa mga heneral at senador na sangkot sa salot na droga.
Binabaka na rin ang kontraktuwalisasyon na nag-ugat sa panahon ng mga dilawan sa hanay ng mga obrero bagama’t hindi madaling durugin ito sa kawalan pa ng batas na laban dito.
MAKILAHOK
Magandang hindi manood lamang ang mga mamamayan ukol sa pangangailangan ng pagtatapos na ng halos 50-anyos nang rebelyong komunista.
May mga malinaw nang nagaganap na pupuwedeng doon magsimulang magkasundo ang pamahalaan at mga rebelde.
Sa pakikilahok ng mga mamamayan, maigigiit nila ang kanilang interes na dapat na higit na pakinggan ng magkabilang panig at hindi ang kani-kanilang interes lamang.
Kung nagpaparamdam na mismo ang Pangulo ng bansa para sa kapayapaan at pagkakasundo-sundo, hindi masamang lumahok ang lahat para rito, alang-alang sa buong bayan.
oOo
Anomang reklamo o puna, mangyaring i-text lamang po sa 09228403333. ULTIMATUM/BENNY ANTIPORDA
