KAILANGAN na ang aksiyon ni DOJ Sec. Leila de Lima at PNP Chief Allan Purisima sa kaso ng “kidnad-for-ransom” sa mga kapatid at manugang ng artistang si Jake Vargas.
Ito ang Totoo: Septiyembre 5, 2012 nang pasukin ng mga Pulis-Olongapo ang bahay nang mag-asawang Joseph at Jonalyn Vargas sa Purok 5, Bgy. New Cabalan, Olongapo City.
Nag-dro-droga umano ang mag-asawa kasama ang isa pang kapatid ni Jake na si Odessa pero sa halip na idetine sa himpilan ng pulisya ay iniikot-ikot lamang ang mag-asawa sakay ng puting kotse habang si Odessa ay pinawalan para kumontak sa kapatid na artista.
P200k umano ang “ransom” ng mag-asawa na nahiram naman ni Jake Vargas sa manager niyang si German Moreno kaya pinawalan ang mga ito.
Sa sama ng loob ng mag-asawa na itinangging nagdo-droga sila, inireklamo ang mga pulis na kinilalang sina PO3 Eleazar Jimenez, PO1 Alexander Quinet Jr., PO3 Arnold Chantengco at PO1 Jason Asuncion.
Subalit lagpas na sa takdang panahon para desisyonan kung isasampa o hindi sa korte ang kaso, walang aksiyon ang Olongapo Prosecutors’ Office, partikular itong si Assistant Prosecutor Rommel Baligod, na dapat sana ay napupuna na ni City Prosecutor Emily delos Santos.
Ito ang Totoo: ang abogado ng pamilya Vargas na si Ian Velacruz ay pinatay ng “riding-in-tandem assasins” noong Sabado ng gabi at hindi maialis sa isip ng marami na may kinalaman ito sa kaso.
Ang pagpatay “execution-style” kay Velacruz ay naganap sa panahong panay ang follow-up nito sa tagal ng aksiyon ng Olongapo Prosecutors’ Office.
Sec. de Lima, pwede po ba kayong makialam na at PNP Chief Purisima, aksiyonan na po ang mga pulis niyo simula kay PNP Region 3 Director Edgardo Ladao na ‘la daw aksiyon kahit ang hinalipak niyang mga tauhan ay walang pakundangan. Ito ang Totoo!
